ილონ მასკი: STARLINK-ის ინტერნეტით სარგებლობისთვის ორბიტაზე საკმარისი სატელიტია

ოქტომბერი 12, 2020

კომპანია SpaceX-ის დამფუძნებლისა და აღმასრულებელი დირექტორის, ილონ მასკის მიერ ტვიტერზე გამოქვეყნებული პოსტის თანახმად, დედამიწის ორბიტაზე განლაგებული Starlink-ის სატელიტების რაოდენობა მაღალსიჩქარიანი ინტერნეტის ბეტა ვერსიით სარგებლობისთვის უკვე საკმარისია. მისი თქმით, ქსელში ჩართვას აშშ-ის ჩრდილოეთ შტატებისა და კანადის სამხრეთ პროვინციების მოსახლეობა შეძლებს.

სამხრეთაფრიკული წარმოშობის მილიარდერმა ეს განცხადება SpaceX-ის მიერ კოსმოსში 60 ახალი ხელოვნური თანამგზავრის გაშვების შემდეგ გააკეთა. კომპანიის მიერ წარმატებით განხორციელებული მორიგი მისიის შედეგად დედამიწის ორბიტაზე გაყვანილი მიკროსატელიტების რაოდენობა თითქმის 800-მდე გაიზარდა.

ილონ მასკს არ დაუზუსტებია, როდის განლაგდებიან Starlink-ის თანამგზავრები მათთვის განკუთვნილ პოზიციაზე, თუმცა აშშ-ში მდებარე ჰარვარდ-სმითსონის ასტროფიზიკის ცენტრის (СfA) მეცნიერის, ჯონათან კრისტოფერ მაკდოველის ვარაუდით, ეს პროცესი, სავარაუდოდ, მომავალი წლის თებერვლამდე გასტანს.

რაკეტას Falcon 9 დედამიწის ორბიტაზე Starlink-ის 60 ახალი სატელიტი გაჰყავს. ფოტო: SpaceX

ილონ მასკის მიერ ჯერ კიდევ აპრილში გაკეთებული განცხადების მიხედვით, Starlink-ის სატელიტური ინტერნეტი პირველი მომხმარებლებისთვის შემოდგომაზე უნდა ყოფილიყო ხელმისაწვდომი. იმის მიუხედავად, რომ სერვისით სარგებლობა მოსახლეობას ჯერჯერობით არ შეუძლია, მას ვაშინგტონის შტატის საგანგებო სიტუაციების მართვის სამსახური ხანძრის შედეგად განადგურებულ ტერიტორიაზე კომუნიკაციისთვის უკვე იყენებს.

პროექტ Starlink-ის ამოცანა დედამიწის ორბიტაზე ხელოვნურ თანამგზავრთა თანავარსკვლავედის შექმნაა, რომლის დანიშნულებაც პლანეტის ნებისმიერი წერტილიდან მაღალი სიჩქარის ინტერნეტთან წვდომის უზრუნველყოფა იქნება. პირველ ეტაპზე სატელიტების რაოდენობა 1500-მდე იქნება, მომავალში კი ჩვენი პლანეტის ორბიტაზე 42 ათასი თანამგზავრის განთავსებას იმედოვნებენ, რის შემდეგაც ქსელში თითქმის მთელი მსოფლიო ჩაერთვება.