0 Your ჩემი კალათა

XBOX-ის ახალი სათამაშო კონსოლები ნოემბერში გამოვა

09/14/2020
ავტორი ავთანდილ ცაგარეიშვილი

ამერიკული ტექნოლოგიური კორპორაცია Microsoft-ის განცხადებით, ახალი თაობის სათამაშო კონსოლების Xbox Series X და Xbox Series S შეძენა მსურველებს 10 ნოემბრიდან, წინასწარი შეკვეთა კი 22 სექტემბრიდან შეეძლებათ.

შავ ფერში გადაწყვეტილი Xbox Series X-ის ღირებულება 499 აშშ დოლარია. ის 4K Blu-ray დისკის წამკითხველით, 8-ბირთვიანი პროცესორით AMD Zen 2 და 12.15 ტერაფლოპსი სიმძლავრის ვიდეობარათით AMD RDNA 2 არის აღჭურვილი. კონსოლის GDDR6 სტანდარტის ოპერატიული მეხსიერება 16GB-ია, მყარი დისკი კი 1TB-იანი SSD, რომლის წარმადობაც წამში 2.4-დან 4.8 გიგაბაიტამდეა. ეს მონაცემების მოკლე დროში ჩატვირთვასა და დიდი მოცულობის ინფორმაციის მარტივად დამუშავებას უწყობს ხელს.



299 აშშ დოლარად შეფასებული Xbox Series S შედარებით მცირე ზომისაა, თეთრადაა შეფერილი და 4K Blu-ray დისკის წამკითხველის გარეშე მუშაობს. საბაზისო მოდელის მსგავსად, ისიც 8-ბირთვიანი პროცესორით AMD Zen 2 არის აღჭურვილი და სამგანზომილებიანი აუდიოჟღერადობის მხარდაჭერა აქვს. მისი ვიდეობარათი 4 ტერაფლოპსი სიმძლავრისაა, ოპერატიული მეხსიერება 10GB-ია, ხოლო მყარი დისკი 512GB.


Microsoft მომხმარებლებს ექსკლუზიური პროგრამით Xbox All Access სარგებლობის საშუალებასაც აძლევს, რომლის მეშვეობითაც კონსოლებისა და დამატებითი სერვისების, მათ შორის, ასობით თამაშის ღირებულება 24 თვეზე გადანაწილდება. Xbox Series X-ის მყიდველები ყოველთვიურად 34.99 აშშ დოლარს, Xbox Series S-ის შემთხვევაში კი 24.99 აშშ დოლარს გადაიხდიან. შეთავაზება ჯერჯერობით მხოლოდ 12 ქვეყანაზე ვრცელდება: ავსტრალია, კანადა, დანია, ფინეთი, საფრანგეთი, ახალი ზელანდია, ნორვეგია, პოლონეთი, სამხრეთ კორეა, შვედეთი, დიდი ბრიტანეთი და აშშ. 2021 წლიდან ამ ჩამონათვალს სხვა სახელმწიფოებიც შეუერთდებიან.

კომენტარები

კომენტარეები ვერ მოიძებნა

შეტყობინების დატოვება