0 Your ჩემი კალათა

5G ინტერნეტის ქსელი გერმანიის ორ ქალაქში ამოქმედდა

07/04/2019
მომხმარებელი ავთანდილ ცაგარეიშვილი

5G მობილური კავშირის დანერგვით ევროპა სამხრეთ კორეას, ჩინეთს და შეერთებულ შტატებს მნიშვნელოვნად ჩამორჩა. ამის მიზეზად ევროკავშირში არსებულ სხვადასხვა ბიუროკრატიულ ბარიერებს ასახელებენ. თუმცა კონტინენტის უმსხვილეს სატელეკომუნიკაციო კომპანიებს მასშტაბური გეგმები აქვთ იმისათვის, რომ რეგიონი 5G ინტერნეტ ქსელზე უახლოეს მომავალში დაჩქარებული ტემპით გადავიდეს.

ევროპის უდიდესმა სატელეკომუნიკაციო კომპანია Deutsche Telekom-მა გერმანიის ორ ქალაქში: ბერლინში და ბონში 5G-ს საცდელი ვერსია აამოქმედა. სატელეკომუნიკაციო გიგანტი 2019 წელს 5G ინტერნეტ ქსელით გერმანიის კიდევ ოთხ ქალაქს დაფარავს. 2020 წლისთვის კი ახალი თაობის ულტრასწრაფი ინტერნეტით სარგებლობის საშუალება მომხმარებელს გერმანიის 20 ქალაქში ექნება.


ერთი კვირის წინ Deutsche Telekom-მა 2,17 მილიარდი ევრო გადაიხადა იმისათვის, რომ ქვეყანაში ახალი თაობის ინტერნეტის დანერგვა დაეწყო. თავდაპირველად სატელეკომუნიკაციო კომპანია 5G ინტერნეტით ქალაქების მჭიდროდ დასახლებულ უბნებს დაფარავს. ულიმიტო ინტერნეტის ღირებულება ხმოვანი შეტყობინებით თვეში 85 ევრო იქნება, ხმოვანი შეტყობინების გარეშე კი 75 ევრო.


პარალელურად კიდევ ერთი მსხვილი სატელეკომუნიკაციო კომპანია Vodafone დიდ ბრიტანეთში მომხმარებელს უკვე 2019 წლის ზაფხულიდან შესთავაზებს ულიმიტო 5G ინტერნეტს. ახალი თაობის ინტერნეტ ქსელით შვიდი ბრიტანული ქალაქის მოსახლეობა ისარგებლებს. ესენია: ლონდონი, ბირმინგემი, მანჩესტერი, ლივერპული, ბრისტოლი, კარდიფი და გლაზგო. ამ ქალაქებს წლის ბოლომდე დიდი ბრიტანეთის კიდევ 12 დასახლებული პუნქტი დაემატება. ამავე დროს, ბრიტანული კომპანია კონტინენტური ევროპის ტურისტული ქალაქების ახალი თაობის ინტერნეტ ქსელით დაფარვის პროექტზეც მუშაობს. საუბარია გერმანიის, იტალიის და ესპანეთის რამდენიმე რეგიონზე.

5G მობილური ინტერნეტის ახალი თაობაა, რომელიც 4G და LTE ქსელებზე 100-ჯერ უფრო სწრაფია. შანხაი მსოფლიოს პირველი ქალაქია, რომლის რამდენიმე უბანი ულტრასწრაფი ინტერნეტ ქსელის დაფარვის ზონაში მოექცა. 5G ქსელის დაფარვის ზონები ჩინეთში China Mobile-თან თანამშრობლობით შეიქმნა.




კომენტარები

კომენტარეები ვერ მოიძებნა

შეტყობინების დატოვება