0 Your ჩემი კალათა

2050 წლისთვის მილიარდზე მეტ ადამიანს იძულებით გადასახლება ემუქრება

09/14/2020
ავტორი ავთანდილ ცაგარეიშვილი

საერთაშორისო ანალიტიკურ კვლევით ცენტრში "ეკონომიკისა და მშვიდობის ინსტიტუტი" (IEP) მომუშავე მეცნიერების განცხადებით, 2050 წლისთვის მილიარდზე მეტ ადამიანს იძულებით გადასახლება ემუქრება. მკვლევართა ვარაუდით, მასობრივი მიგრაციის მიზეზი კლიმატის ცვლილებით გამოწვეული ეკოლოგიური კატასტროფები და მოსახლეობის რაოდენობის მკვეთრი მატება გახდება.


მეცნიერებმა კვლევისთვის გაეროსა და სხვა ორგანიზაციების მიერ შეგროვებული მონაცემები გამოიყენეს, რომელთა საფუძველზეც 157 სახელმწიფოზე რვა ძირითადი ეკოლოგიური საფრთხის შესაძლო გავლენა და მათთან გასამკლავებლად ამ ქვეყნების მზადყოფნა შეისწავლეს. აღმოჩნდა, რომ 2050 წლისთვის მინიმუმ ერთი ასეთი გამოწვევის წინაშე 141 სახელმწიფო აღმოჩნდება. სუბსაჰარული და ჩრდილოეთ აფრიკა, სამხრეთ აზია და შუა აღმოსავლეთი კი ის რეგიონებია, რომლებსაც ამ მხრივ ყველაზე მეტი საშიშროება ემუქრება.

ისეთი ქვეყნები, როგორებიცაა ინდოეთი და ჩინეთი, ძირითადად ხარისხიანი სასმელი წყლის დეფიციტის პრობლემის წინაშე აღმოჩნდებიან. ნიგერიის, ანგოლის, ბურკინა-ფასოსა და უგანდის შემთხვევაში კი ეკოლოგიურ საფრთხეებს მოსახლეობის რაოდენობის მნიშვნელოვანი ზრდა დაემატება, რაც მის შემდგომ მიგრაციას განაპირობებს. აღსანიშნავია ისიც, რომ 19 ქვეყანა, რომელიც სასმელი წყლისა და სურსათის დეფიციტთან ერთად, ერთროულად რამდენიმე ბუნებრივი კატაკლიზმის საშიშროების წინაშეც დგას, მსოფლიოს 40 ყველაზე ნაკლებად მშვიდობიანი სახელმწიფოს ჩამონათვალში შედის. საერთო ჯამში კი, ეკოლოგიური საფრთხეებისადმი განსაკუთრებით მოწყვლად 31 ქვეყანაში 1.2 მილიარდი ადამიანი ცხოვრობს.

ბურკინა-ფასოში მცხოვრები ბავშვები წყლის რიგში. ფოტო: Anne Mimault

2050 წლისთვის მიგრაციის მაჩვენებელი განსაკუთრებით აფრიკის კონტინენტსა და სამხრეთ აზიის რეგიონში მოიმატებს. იმ ქვეყნების ჩამონათვალს, რომლებსაც მოსახლეობის მასობრივი გადასახლების რისკი ყველაზე მეტად ემუქრება, პაკისტანი ლიდერობს. მას ეთიოპია და ირანი მოსდევენ. მკვლევართა განცხადებით, მცირე მასშტაბის ეკოლოგიური საფრთხე ან ბუნებრივი კატასტროფაც კი საკმარისია იმისთვის, რომ ამ სახელმწიფოთა მოქალაქეებმა საცხოვრებელი ადგილების დატოვება დაიწყონ.

იმის მიუხედავად, რომ კლიმატის ცვლილების შედეგები ევროპასა და ჩრდილოეთ ამერიკაშიც იქნება შესამჩნევი, მეცნიერთა ვარაუდით, ამ რეგიონებში მდებარე განვითარებული ქვეყნები ეკოლოგიურ საფრთხეებთან გამკლავებას წარმატებით შეძლებენ. იმ სახელმწიფოთა შორის კი, რომლებსაც მსგავსი პრობლემები საერთოდ არ ემუქრებათ, შვედეთს, ნორვეგიას, ირლანდიასა და ისლანდიას მოიაზრებენ.


ბოლო მონაცემებით, მსოფლიოში 7.8 მილიარდი ადამიანი ცხოვრობს. ვარაუდობენ, რომ მათი რიცხვი 2050 წლისთვის 10 მილიარდი გახდება, რაც ბუნებრივ რესურსებზე მოთხოვნას გაზრდის. მკვლევართა პროგნოზით, ამ დროისთვის შიმშილის საფრთხე 3.5 მილიარდ ადამიანს დაემუქრება, წყლის დეფიციტი კი, რომელსაც ამჟამად უკვე 2.6 მილიარდი ადამიანი განიცდის, კიდევ უფრო გამწვავდება. მეცნიერები შიშობენ, რომ მოვლენათა მსგავსი სცენარით განვითარება არაერთ დაპირისპირებას გამოიწვევს, რაც შესაძლოა, შეიარაღებულ კონფლიქტებშიც გადაიზარდოს.

კომენტარები

კომენტარეები ვერ მოიძებნა

შეტყობინების დატოვება