0 Your ჩემი კალათა

44.2 ტერაბიტი/წამში - ინტერნეტის სიჩქარის ახალი რეკორდი დამყარდა

05/26/2020
ავტორი ავთანდილ ცაგარეიშვილი

ავსტრალიის მონაშისა და სუინბერნის უნივერსიტეტებსა და მელბურნის სამეფო ტექნოლოგიურ ინსტიტუტში მომუშავე მეცნიერებმა შეიმუშავეს ტექნოლოგია, რომლის მეშვეობითაც მონაცემთა გადაცემა წამში 44.2 ტერაბიტი სიჩქარით შეძლეს.


ინტერნეტის სიჩქარის ახალი რეკორდი ოპტიკური მიკროჩიპის საშუალებით დამყარდა, რომლითაც მკვლევრებმა მონაცემთა გადაცემისთვის ტრადიციულად გამოყენებადი 80 ინფრაწითელი ლაზერი ჩაანაცვლეს. გამოცემაში Nature Communications გამოქვეყნებული ნაშრომის ავტორები აღნიშნავენ, რომ მისი მეშვეობით სულ რაღაც ერთ წამში 1000 მაღალი გარჩევადობის ფილმის ჩამოტვირთვა იქნება შესაძლებელი.

ოპტიკური ჩიპი, რომლის საშუალებითაც მონაცემთა გადაცემის სიჩქარის რეკორდი მოიხსნა. ფოტო: Scimex
ოპტიკური ჩიპი, რომლის საშუალებითაც მონაცემთა გადაცემის სიჩქარის რეკორდი მოიხსნა. ფოტო: Scimex

მეცნიერებმა ინტერნეტის ასეთ სიჩქარეს micro-comb-ის სახელით ცნობილი ტექნოლოგიით მიაღწიეს, რომელიც ამ დროისთვის მონაცემთა გადაცემის ყველაზე ეფექტური და კომპაქტური საშუალებაა. ჯერ კიდევ ათ წლის წინ შექმნილი ოპტიკური მიკროჩიპი, განახლებისა და დახვეწის შემდეგ, საველე პირობებში პირველად გამოცადეს. ექსპერიმენტის ფარგლებში მკვლევრებმა ის სასწავლო დაწესებულებების შენობებს შორის გადაჭიმულ ოპტიკურ-ბოჭკოვან კაბელს დაუკავშირეს, რაც იმას ნიშნავს, რომ მისი გამოყენება უკვე არსებულ ინფრასტრუქტურაშიც შეიძლება.



ექსპერიმენტის წარმატების მიუხედავად, უახლოეს დროში წამში 44.2 ტერაბიტი სიჩქარის ინტერნეტით ონლაინ თამაშსა თუ ფილმების ყურებას, სავარაუდოდ, ვერ შევძლებთ. ახალი ტექნოლოგია თავდაპირველად სახელმწიფო დაწესებულებებისთვის იქნება ხელმისაწვდომი ისევე, როგორც ამჟამად მოქმედი ESnet-ის ქსელი, რომელიც მონაცემთა გადაცემას წამში 400 გიგაბიტი სიჩქარით უზრუნველყოფს, მაგრამ მხოლოდ ისეთი ორგანიზაციებისთვისაა განკუთვნილი, როგორიცაა, მაგალითად, აშშ-ის აერონავტიკისა და კოსმოსური კვლევების სააგენტო (NASA). თუმცა, მეცნიერთა აზრით, ინტერნეტის მოწოდების ტრადიციული სისტემა მომავალში ბევრ პრობლემას წააწყდება და მომხმარებელთა მზარდი მოთხოვნილებების დაკმაყოფილებასაც ვეღარ შეძლებს. ამის გამო, ადრე თუ გვიან მისი შეცვლა მოგვიწევს, რა დროსაც ოპტიკური მიკროჩიპი საუკეთესო არჩევანი იქნება.

კომენტარები

კომენტარეები ვერ მოიძებნა

შეტყობინების დატოვება