0 Your ჩემი კალათა

თაღლითები 5G-ისგან "დამცავ" USB ფლეშ ბარათებს ყიდიან

06/02/2020
ავტორი ავთანდილ ცაგარეიშვილი

მცდარი მოსაზრება 5G ინტერნეტის მავნებლობის შესახებ მსოფლიოს არაერთ ქვეყანაში გავრცელდა და სოციალურ ქსელებსა თუ მედიაში მწვავე დისკუსიების გარდა, ვანდალიზმის აქტებიც გამოიწვია.

ადამიანების შიშითა და გაურკვევლობით დიდ ბრიტანეთში დაფუძნებულმა კომპანიამ BioShield Distribution ისარგებლა და 5G-ისგან "დამცავი" USB ფლეშ მეხსიერების ბარათების გაყიდვა დაიწყო. ისინი გველეშაპთან მებრძოლი წმინდა გიორგის გამოსახულებითაა გაფორმებული და თითოეულის ღირებულება 283 გირვანქა სტერლინგია (1,110 ლარი). კომპანიის ვებგვერდზე მომხმარებლებს ფასდაკლებასაც სთავაზობენ - სამი ცალი 795 გირვანქა სტერლინგად (3,120 ლარი), თუმცა შეძენის შემთხვევაში, აღმოაჩენთ, რომ საქმე სტანდარტულ, 128MB მოცულობის მეხსიერების ბარათთან გაქვთ, რომლის გამოწერაც ჩინეთიდან სულ რაღაც 5 გირვანქა სტერლინგადაა შესაძლებელი.


კომპანია BioShield Distribution თავის ვებგვერდზე 5G-ისგან "დამცავ" USB ფლეშ მეხსიერების ბარათებს ყიდის.
კომპანია BioShield Distribution თავის ვებგვერდზე 5G-ისგან "დამცავ" USB ფლეშ მეხსიერების ბარათებს ყიდის.

კომპანიის ვებვერდზე ვკითხულობთ, რომ პროდუქტი კვანტურ ტექნოლოგიაზეა დაფუძნებული, რომლის მეშვეობითაც ის მომხმარებლებს ჯანმრთელობისთვის საშიშ რადიაციასა და 5G-ის უარყოფით ზემოქმედებას არიდებს. ამისთვის მხოლოდ ფლეშ ბარათის მობილურ ტელეფონთან, კომპიუტერთან ან სხვა ელექტრონულ მოწყობილობებთან ახლოს დადებაა საჭირო.

BioShield-ის ფლეშ ბარათები საკმაო პოპულარობით სარგებლობს. BBC-ის მიერ გავრცელებული ინფორმაციით, მისი გამოყენება საზოგადოებას ქალაქ გლასტონბერის საბჭოს მრჩეველთა კომიტეტის ერთ-ერთმა წევრმა, ტომ ჰოლმაც კი ურჩია. ბრიტანული მედიის ყურადღება ჰოლმა მცირე ხნით ადრე გამოქვეყნებული ანგარიშითაც მიიპყრო, რომელშიც ამტკიცებდა, რომ 5G ინტერნეტი კორონავირუსს ავრცელებს, ფრინველებს ხოცავს და ადამიანებს თვითმკვლელობისაკენ უბიძგებს.


ყოველივე ზემოხსენებულის მეცნიერული მტკიცებულებები, რა თქმა უნდა, არ არსებობს და მათ, დიდი ალბათობით, არც მომავალში უნდა ველოდოთ. რაც შეეხება კომპანიას BioShield Distributions, მისი საქმიანობით შესაბამისი მარეგულირებელი ორგანო დაინტერესდა, რომლის წარმომადგენლებიც იმედოვნებენ, რომ პოლიციასთან ერთად სასამართლოს მიერ სპეციალური განკარგულების გაცემას მიაღწევენ, რათა თაღლითებმა მომხმარებლების მოტყუება ვეღარ შეძლონ.

კომენტარები

კომენტარეები ვერ მოიძებნა

შეტყობინების დატოვება